ನಕ್ಕು ಬಿಡು ಒಮ್ಮೆ

ನಕ್ಕು ಬಿಡು ಒಮ್ಮೆ
ಗುಳಿಬೀಳಲಿ ಕೆನ್ನೆ|
ಸರಿಯಲ್ಲ ಈ ಮೌನ ನಿನಗೆ
ನನ್ನ ಮಾತೇ ಮರೆತು ಹೋಗಿದೆ ನನಗೆ|
ಮನೆ ಮನದ ತುಂಬೆಲ್ಲ
ಹರಿಯುತಿದೆ ಬರಿಯ ಮೌನ…
ನನಗೀಗ ನಿನ್ನ ಮೌನದೇ ವ್ಯಸನ||

ಮರೆತುಬಿಡು ಎಲ್ಲಾ,
ನನ್ನೆಲ್ಲಾ ಒರಟುತನ|
ಅಪ್ಪಿಕೋ ನನ್ನೆಲ್ಲಾ ಒಳ್ಳೆಯಾತನ
ತಾಳಲಾರೆ ನಿನ್ನಯಾ ಈ ಒಂಟಿತನ|
ಮುನಿಸು ಸರಿಸಿ ನಗಬಾರದೇ ರನ್ನ, ನನ್ನ ಚಿನ್ನಾ||

ನಿನ್ನಂತಹ ಚೆಲುವೆಗೆ
ಮೃದು ಮಾತೇ ಬಂಗಾರ|
ಕಿಲಕಿಲ ನೀ ನಗುತಲಿರೆ
ಸಂಭ್ರಮ ಸಂತೋಷ ಸಡಗರ|
ನೀ ನಸುನಗುತ ಮಿನಗುತಿರೆ
ರಸಶೃಂಗಾರ ಸೌಂದರ್ಯ
ಇಲ್ಲದಿರಿನ್ನೆಲ್ಲಿ ಮಾಧುರ್ಯ ||

ಬೆಳಗಾದರೆಮ್ಮ
ಮದುವೆಯಾದ ಸುದಿನ|
ಕರೆದೊಯ್ಯುವೆ
ನಿನ್ನನಂದಿನ ರಸಘಳಿಗೆಯಾಕ್ಷಣ|
ಕೈ ಮುಗಿವೆ ಮನ್ನಿಸೆನ್ನ
ತಮಾಷೆಗೆ ಹಾಗಂದೆ ನಿನಗಿಂತ
ಅವಳೇ ಲಕ್ಷಣಾ|
ಸದಾ ಮುನಿಸುತಿರೆ ನೀ
ಮುಗಿದಂತೆಯೇ ನನ್ನ ಜೀವನ||
*****